കെവിൻ കാർട്ടർ - കഴുകനും പെൺകുട്ടിയും

ആഫ്രിക്കൻ രാജ്യമായ സുഡാനിലെതീക്ഷ്ണമായ പട്ടിണിയുടെ നേർക്കാഴ്ചയായിരുന്നു കെവിൻ കാർട്ടർ തൻ്റെ ക്യാമറയിൽ ഒപ്പിയെടുത്ത ലോകശ്രദ്ധ നേടിയ 'കഴുകനും പെൺകുട്ടിയും' എന്ന ചിത്രം.ദക്ഷിണാഫ്രിക്കയിലെ ജൊഹനാസ്സ്ബർഗ് സൺഡേ പത്രത്തിൽ ഫോട്ടോജേര്‍ണലിസ്റ്റായി പ്രവർത്തിച്ചിരുന്ന കെവിൻ കാർട്ടറും സുഹൃത്ത് സിൽവയും സുഡാൻ ജീവിതം പകർത്താനായി 1993 മാർച്ചിലാണ്‌ ദക്ഷിണ അയോഡ് എന്ന ഗ്രാമത്തിലെത്തുന്നത്.

സുഡാനികളുടെ ക്ഷേമത്തിനായി പ്രവർത്തിക്കുന്ന യു. എൻ. ക്യാമ്പിനരികിലൂടെ ദൃശ്യങ്ങൾ പകർത്തി നടക്കുമ്പോഴാണ് , മുഴുപ്പട്ടിണിയാൽ എല്ലുന്തിയ കൊച്ചു പെൺകുട്ടി പൊള്ളുന്ന വെയിലിൽ ക്യാമ്പിലേക്ക് ഇഴഞ്ഞുനീങ്ങുന്നത് കണ്ടത്. ആ ദൃശ്യം ക്യാമറയിൽ പകർത്താനൊരുങ്ങവേ പെട്ടെന്ന് ഒരു കഴുകൻ കുഞ്ഞിനെ ഭക്ഷണമാക്കാനായി പറന്നിറങ്ങി. മരണത്തിനും ജീവിതത്തിനും ഇടയിലെ നേർകാഴ്ച. കഴുകൻ ചിറകു വിരിക്കുന്നതും കാത്ത് കാർട്ടർ ഒരു മരത്തിന്റെ ചുവട്ടിലിരുന്നു. എന്നാൽ ആ കഴുകൻ കുഞ്ഞിനെ ആക്രമിച്ചില്ല. ഒടുവിൽ കാർട്ടർ കുട്ടിയെയും കഴുകനെയും ഒരേ ഫ്രെയിമിലാക്കി. അപ്പോഴേക്കും ആ കുഞ്ഞുശരീരത്തിൽ നിന്നും അവസാനശ്വാസവും അണഞ്ഞുപോയിരുന്നു.